ਦੁਬਈ, Jun 01 ਇਰਾਨ ਵੱਲੋਂ ਹਫ਼ਤੇ ਦੇ ਅਖੀਰ ਵਿੱਚ ਇੱਕ ਅਮਰੀਕੀ ‘ਐੱਮ ਕਿਊ -1 ਪ੍ਰੀਡੇਟਰ’ ਡਰੋਨ ਨੂੰ ਮਾਰ ਗਿਰਾਉਣ ਤੋਂ ਬਾਅਦ, ਜਵਾਬ ਵਿੱਚ ਅਮਰੀਕਾ ਨੇ ਇਰਾਨ ਦੇ ਰਡਾਰ ਅਤੇ ਡਰੋਨ ਕੰਟਰੋਲ ਸੈਂਟਰਾਂ ‘ਤੇ ਬੰਬ ਸੁੱਟੇ ਹਨ। ਅਮਰੀਕੀ ਫ਼ੌਜ ਨੇ ਸੋਮਵਾਰ ਨੂੰ ਇਹ ਜਾਣਕਾਰੀ ਦਿੱਤੀ ਹੈ। ਇਰਾਨ ਨੇ ਜਵਾਬੀ ਹਮਲਾ ਕਰਨ ਦੀ ਗੱਲ ਸਵੀਕਾਰ ਕੀਤੀ। ਇਸ ਦੌਰਾਨ ਕੁਵੈਤ ਨੇ ਕਿਹਾ ਕਿ ਉਸ ‘ਤੇ ਡਰੋਨ ਅਤੇ ਮਿਜ਼ਾਈਲ ਹਮਲੇ ਕੀਤੇ ਗਏ, ਜਿਨ੍ਹਾਂ ਨੂੰ ਉਨ੍ਹਾਂ ਦੇ ਨਿਸ਼ਾਨੇ ਤੱਕ ਪਹੁੰਚਣ ਤੋਂ ਰੋਕਣ ਲਈ ਉਸ ਦੀਆਂ ਹਵਾਈ ਰੱਖਿਆ ਪ੍ਰਣਾਲੀਆਂ (ਏਅਰ ਡਿਫੈਂਸ ਸਿਸਟਮ) ਨੇ ਕਾਰਵਾਈ ਸ਼ੁਰੂ ਕਰ ਦਿੱਤੀ।
ਇਹ ਹਮਲੇ ਇਰਾਨ ਯੁੱਧ ਵਿੱਚ ਕਈ ਹਫ਼ਤਿਆਂ ਤੋਂ ਲਾਗੂ ਜੰਗਬੰਦੀ ਦੀ ਨਾਜ਼ੁਕ ਸਥਿਤੀ ਨੂੰ ਦਰਸਾਉਂਦੇ ਹਨ। ਅਮਰੀਕੀ ਅਤੇ ਇਰਾਨੀ ਅਧਿਕਾਰੀ ਇਸ ਜੰਗਬੰਦੀ ਦੀ ਮਿਆਦ ਨੂੰ ਵਧਾਉਣ ਲਈ ਸਮਝੌਤੇ ‘ਤੇ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ, ਪਰ ਇਸ ਦੇ ਬਾਵਜੂਦ ਹਮਲੇ ਲਗਾਤਾਰ ਜਾਰੀ ਹਨ।
ਇਰਾਨ ਨੇ ਹੋਰਮੁਜ਼ ਜਲ ਮਾਰਗ ‘ਤੇ ਆਪਣਾ ਕਬਜ਼ਾ ਜਮਾਇਆ ਹੋਇਆ ਹੈ, ਜਿਸ ਕਰਕੇ ਦੁਨੀਆ ਭਰ ਵਿੱਚ ਤੇਲ-ਗੈਸ (ਊਰਜਾ) ਦੀ ਸਪਲਾਈ ‘ਤੇ ਅਸਰ ਪਿਆ ਹੈ। ਕਿਸੇ ਸਮੇਂ ਫ਼ਾਰਸ ਦੀ ਖਾੜੀ ਦੇ ਇਸ ਤੰਗ ਰਸਤੇ ਰਾਹੀਂ ਦੁਨੀਆ ਦੇ ਕੁੱਲ ਤੇਲ ਅਤੇ ਕੁਦਰਤੀ ਗੈਸ ਦੇ ਵਪਾਰ ਦਾ ਪੰਜਵਾਂ ਹਿੱਸਾ (20 ਫ਼ੀਸਦੀ) ਲੰਘਦਾ ਸੀ।
ਇਸੇ ਦੌਰਾਨ, ਹਾਲਾਤ ਲਗਾਤਾਰ ਹੋਰ ਖ਼ਰਾਬ ਹੁੰਦੇ ਜਾ ਰਹੇ ਹਨ। ਇਜ਼ਰਾਈਲ ਨੇ ਲੇਬਨਾਨ ਦੇ ਅੰਦਰ ਲਿਤਾਨੀ ਨਦੀ ਤੋਂ ਅੱਗੇ ਤੱਕ ਆਪਣਾ ਕਬਜ਼ਾ ਕਰ ਲਿਆ ਹੈ, ਜਦੋਂ ਕਿ ਦੂਜੇ ਪਾਸੇ ਹਿਜ਼ਬੁੱਲਾ ਸੰਗਠਨ ਵੀ ਇਜ਼ਰਾਈਲ ਉੱਤੇ ਲਗਾਤਾਰ ਡਰੋਨ ਹਮਲੇ ਕਰ ਰਿਹਾ ਹੈ।
ਅਮਰੀਕੀ ਫ਼ੌਜ ਦੀ ‘ਸੈਂਟਰਲ ਕਮਾਂਡ’ ਨੇ ਕਿਹਾ ਕਿ ਉਸ ਨੇ ਸ਼ਨਿੱਚਰਵਾਰ ਅਤੇ ਐਤਵਾਰ ਨੂੰ ਇਰਾਨ ਦੇ ਗੇਰੂਕ ਸ਼ਹਿਰ ਅਤੇ ਕੇਸ਼ਮ ਟਾਪੂ ਦੇ ਆਲੇ-ਦੁਆਲੇ ਹਮਲੇ ਕੀਤੇ।
‘ਸੈਂਟਰਲ ਕਮਾਂਡ’ ਨੇ ਕਿਹਾ, “ਇਹ ਹਮਲੇ ਬਹੁਤ ਸੀਮਤ ਅਤੇ ਸੋਚ-ਸਮਝ ਕੇ ਇਰਾਨ ਦੀਆਂ ਹਮਲਾਵਰ ਕਾਰਵਾਈਆਂ ਦੇ ਜਵਾਬ ਵਿੱਚ ਕੀਤੇ ਗਏ ਹਨ। ਇਨ੍ਹਾਂ ਕਾਰਵਾਈਆਂ ਵਿੱਚ ਕੌਮਾਂਤਰੀ ਸਮੁੰਦਰੀ ਖੇਤਰ ਦੇ ਉੱਪਰ ਉਡਾਣ ਭਰ ਰਹੇ ‘ਅਮਰੀਕੀ ਐੱਮ.ਕਿਊ.-1’ ਡਰੋਨ ਨੂੰ ਇਰਾਨ ਵੱਲੋਂ ਮਾਰ ਗਿਰਾਉਣਾ ਵੀ ਸ਼ਾਮਲ ਹੈ।”
ਕਮਾਂਡ ਨੇ ਕਿਹਾ, “ਅਮਰੀਕੀ ਲੜਾਕੂ ਜਹਾਜ਼ਾਂ ਨੇ ਤੁਰੰਤ ਐਕਸ਼ਨ ਲੈਂਦੇ ਹੋਏ ਇਰਾਨ ਦੇ ਏਅਰ ਡਿਫੈਂਸ ਸਿਸਟਮ (ਹਵਾਈ ਰੱਖਿਆ ਪ੍ਰਣਾਲੀ), ਇੱਕ ਜ਼ਮੀਨੀ ਕੰਟਰੋਲ ਸੈਂਟਰ ਅਤੇ ਦੋ ਅਜਿਹੇ ਡਰੋਨਾਂ ਨੂੰ ਤਬਾਹ ਕਰ ਦਿੱਤਾ, ਜੋ ਉਸ ਇਲਾਕੇ ਦੇ ਸਮੁੰਦਰੀ ਰਸਤੇ ਤੋਂ ਲੰਘ ਰਹੇ ਜਹਾਜ਼ਾਂ ਲਈ ਸਿੱਧਾ ਖ਼ਤਰਾ ਬਣੇ ਹੋਏ ਸਨ।”
ਇਰਾਨ ਦੀ ਸਰਕਾਰੀ ਸਮਾਚਾਰ ਏਜੰਸੀ ‘ਆਈ ਆਰ ਐੱਨ ਏ ‘ (IRNA) ਦੀ ਖ਼ਬਰ ਅਨੁਸਾਰ, ਇਰਾਨੀ ਅਰਧ-ਸੈਨਿਕ ਬਲ ‘ਰਿਵੋਲਿਊਸ਼ਨਰੀ ਗਾਰਡ’ ਨੇ ਇੱਕ ਬਿਆਨ ਵਿੱਚ ਦੱਸਿਆ ਕਿ ਅਮਰੀਕੀ ਬਲਾਂ ਨੇ ਇੱਕ ਟਾਪੂ ‘ਤੇ ਟੈਲੀਕਾਮ ਟਾਵਰ ਨੂੰ ਨਿਸ਼ਾਨਾ ਬਣਾਇਆ।
‘ਰਿਵੋਲਿਊਸ਼ਨਰੀ ਗਾਰਡ’ ਨੇ ਕਿਹਾ ਕਿ ਉਸ ਨੇ ਜਵਾਬੀ ਹਮਲਾ ਕੀਤਾ ਪਰ ਇਹ ਨਹੀਂ ਦੱਸਿਆ ਕਿ ਹਮਲਾ ਕਿੱਥੇ ਕੀਤਾ ਗਿਆ।
