‘ਕਾਂਗਰੈਸ਼ਨਲ ਰਿਸਰਚ ਸਰਵਿਸ’ ਦੀ ਇਸ ਹਫ਼ਤੇ ਅਪਡੇਟ ਕੀਤੀ ਗਈ ਰਿਪੋਰਟ ਮੁਤਾਬਕ, ਇਰਾਨ ਨਾਲ ਚੱਲ ਰਹੀ ਜੰਗ ਦੌਰਾਨ ਘੱਟੋ-ਘੱਟ 81 ਅਮਰੀਕੀ ਫੌਜੀ ਜਹਾਜ਼ ਅਤੇ ਡਰੋਨ ਨੁਕਸਾਨੇ ਗਏ ਹਨ ਜਾਂ ਪੂਰੀ ਤਰ੍ਹਾਂ ਤਬਾਹ ਹੋ ਚੁੱਕੇ ਹਨ। ਇਨ੍ਹਾਂ ਵਿੱਚ ਇਰਾਨ ‘ਚ ਦੋ ਅਮਰੀਕੀ ਪਾਇਲਟਾਂ ਨੂੰ ਬਚਾਉਣ ਲਈ ਚਲਾਏ ਗਏ ਮਿਸ਼ਨ ਦੌਰਾਨ ਤਬਾਹ ਹੋਏ ਜਹਾਜ਼ ਵੀ ਸ਼ਾਮਲ ਹਨ, ਜਿਨ੍ਹਾਂ ਦੀ ਪੁਸ਼ਟੀ ਅਮਰੀਕੀ ਫੌਜ ਪਹਿਲਾਂ ਹੀ ਜਨਤਕ ਤੌਰ ‘ਤੇ ਕਰ ਚੁੱਕੀ ਹੈ। ਇਸ ਤੋਂ ਇਲਾਵਾ ਸੂਚੀ ਵਿੱਚ ਉਹ ਦਰਜਨਾਂ ਡਰੋਨ ਵੀ ਸ਼ਾਮਲ ਹਨ, ਜਿਨ੍ਹਾਂ ਬਾਰੇ ਫੌਜ ਨੇ ਕੋਈ ਵੀ ਜਾਣਕਾਰੀ ਸਾਂਝੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ।
ਰਿਪੋਰਟ ਅਨੁਸਾਰ ਪ੍ਰਭਾਵਿਤ ਹੋਏ 81 ਜਹਾਜ਼ਾਂ ਅਤੇ ਡਰੋਨਾਂ ਵਿੱਚੋਂ 45 ਐੱਮਕਿਊ-9 ਰੀਪਰ (MQ-9 Reaper) ਡਰੋਨ, 12 ਐੱਫ-15ਈ ਸਟ੍ਰਾਈਕ ਈਗਲ (F-15E Strike Eagle) ਲੜਾਕੂ ਜਹਾਜ਼, ਹਵਾ ਵਿੱਚ ਤੇਲ ਭਰਨ ਵਾਲੇ 7 ਕੇਸੀ-135 ਸਟ੍ਰੈਟੋਟੈਂਕਰ (KC-135 Stratotanker) ਜਹਾਜ਼ ਅਤੇ ਇੱਕ ਐੱਫ-35ਏ ਲਾਈਟਨਿੰਗ-II (F-35A Lightning II) ਲੜਾਕੂ ਜਹਾਜ਼ ਸ਼ਾਮਲ ਹੈ।
ਇਹ ਰਿਪੋਰਟ ਜੰਗ ਦੌਰਾਨ ਅਮਰੀਕਾ ਨੂੰ ਹੋਏ ਅਸਲ ਨੁਕਸਾਨ ਦੀ ਇੱਕ ਸਪਸ਼ਟ ਤਸਵੀਰ ਪੇਸ਼ ਕਰਦੀ ਹੈ, ਕਿਉਂਕਿ ਅਮਰੀਕੀ ਫੌਜ ਨੇ ਆਪਣੇ ਸਾਜ਼ੋ-ਸਾਮਾਨ ਅਤੇ ਫੌਜੀ ਅੱਡਿਆਂ (ਬੇਸਾਂ) ਦੇ ਨੁਕਸਾਨ ਬਾਰੇ ਅਜੇ ਤੱਕ ਕੋਈ ਅਧਿਕਾਰਤ ਜਾਂ ਵਿਸਥਾਰਤ ਸੂਚੀ ਜਾਰੀ ਨਹੀਂ ਕੀਤੀ ਹੈ।
ਹਾਲਾਂਕਿ ਇਸ ਰਿਪੋਰਟ ਵਿੱਚ ਕੁਝ ਜਾਣਕਾਰੀ ਸਰਕਾਰੀ ਸਰੋਤਾਂ ਦੀ ਬਜਾਏ ਮੀਡੀਆ ਰਿਪੋਰਟਾਂ ਦੇ ਆਧਾਰ ‘ਤੇ ਦਿੱਤੀ ਗਈ ਹੈ, ਪਰ ਇਸ ਰਿਪੋਰਟ ਦੇ ਪਿਛਲੇ ਸੰਸਕਰਣਾਂ ਦਾ ਹਵਾਲਾ ਖੁਦ ਪੈਂਟਾਗਨ ਦੇ ਇੰਸਪੈਕਟਰ ਜਨਰਲ ਵੱਲੋਂ ਵੀ ਦਿੱਤਾ ਜਾ ਚੁੱਕਾ ਹੈ।
