ਘਰੇਲੂ ਉਡਾਣਾਂ ’ਤੇ ਦੂਰੀ ਮੁਤਾਬਕ ਸਰਚਾਰਜ

ਏਅਰ ਇੰਡੀਆ ਅਤੇ ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਵੀਰਵਾਰ ਨੂੰ ਘਰੇਲੂ ਅਤੇ ਕੁਝ ਕੌਮਾਂਤਰੀ ਰੂਟਾਂ ਲਈ ਤੇਲ ਸਰਚਾਰਜ ਵਿੱਚ ਸੋਧ ਦਾ ਐਲਾਨ ਕੀਤਾ। ਨਵੇਂ ਖਰਚੇ 9 ਅਕਤੂਬਰ ਤੋਂ ਕੀਤੀਆਂ ਜਾਣ ਵਾਲੀਆਂ ਬੁਕਿੰਗਾਂ ’ਤੇ ਲਾਗੂ ਹੋਣਗੇ।

ਦੋਵਾਂ ਏਅਰਲਾਈਨਾਂ ਦੀਆਂ ਘਰੇਲੂ ਉਡਾਣਾਂ ਵਿੱਚ 500 ਕਿਲੋਮੀਟਰ ਤੱਕ ਦੀ ਦੂਰੀ ਲਈ 400 ਰੁਪਏ ਸਰਚਾਰਜ ਲੱਗੇਗਾ। 501 ਤੋਂ 1,000 ਕਿਲੋਮੀਟਰ ਲਈ ਇਹ ਰਕਮ 600 ਰੁਪਏ, 1,001 ਤੋਂ 1,500 ਕਿਲੋਮੀਟਰ ਲਈ 850 ਰੁਪਏ ਅਤੇ 1,501 ਕਿਲੋਮੀਟਰ ਤੋਂ ਵੱਧ ਦੀ ਦੂਰੀ ਲਈ 1,200 ਰੁਪਏ ਹੋਵੇਗੀ।

ਕੌਮਾਂਤਰੀ ਉਡਾਣਾਂ ਲਈ ਇੱਕ ਪਾਸੇ ਦਾ ਸਰਚਾਰਜ ਉੱਤਰੀ ਅਮਰੀਕਾ ਲਈ 215 ਅਮਰੀਕੀ ਡਾਲਰ, ਆਸਟਰੇਲੀਆ ਲਈ 210 ਡਾਲਰ, ਯੂਰਪ ਅਤੇ ਬਰਤਾਨੀਆ ਲਈ 135 ਡਾਲਰ ਅਤੇ ਪੱਛਮੀ ਏਸ਼ੀਆ ਤੇ ਮੱਧ ਪੂਰਬ ਲਈ 55 ਡਾਲਰ ਰੱਖਿਆ ਗਿਆ ਹੈ। ਏਅਰ ਇੰਡੀਆ ਐਕਸਪ੍ਰੈੱਸ ਦੀਆਂ ਨਵੀਆਂ ਬੁਕਿੰਗਾਂ ’ਤੇ ਇਹ ਖਰਚਾ 9 ਅਕਤੂਬਰ ਨੂੰ ਰਾਤ 12 ਵਜੇ ਤੋਂ ਲਾਗੂ ਹੋਵੇਗਾ, ਜਦਕਿ ਏਅਰ ਇੰਡੀਆ ਲਈ ਨਵੀਆਂ ਬੁਕਿੰਗਾਂ ’ਤੇ ਇਹ ਸਵੇਰੇ 11 ਵਜੇ ਤੋਂ ਲਾਗੂ ਹੋਵੇਗਾ।

ਅਕਾਸਾ ਏਅਰ ਨੇ ਵੀ ਵਧਾਇਆ ਖਰਚਾ

ਅਕਾਸਾ ਏਅਰ ਨੇ ਘਰੇਲੂ ਉਡਾਣਾਂ ’ਤੇ 500 ਕਿਲੋਮੀਟਰ ਤੱਕ 375 ਰੁਪਏ, 501 ਤੋਂ 1,000 ਕਿਲੋਮੀਟਰ ਲਈ 600 ਰੁਪਏ, 1,001 ਤੋਂ 1,500 ਕਿਲੋਮੀਟਰ ਲਈ 900 ਰੁਪਏ ਅਤੇ 1,501 ਕਿਲੋਮੀਟਰ ਜਾਂ ਇਸ ਤੋਂ ਵੱਧ ਲਈ 1,150 ਰੁਪਏ ਸਰਚਾਰਜ ਤੈਅ ਕੀਤਾ ਹੈ।

ਕੌਮਾਂਤਰੀ ਉਡਾਣਾਂ ’ਤੇ ਭਾਰਤ ਤੋਂ ਕੁਵੈਤ, ਕਤਰ, ਸਾਊਦੀ ਅਰਬ, ਸੰਯੁਕਤ ਅਰਬ ਅਮੀਰਾਤ, ਥਾਈਲੈਂਡ ਅਤੇ ਵੀਅਤਨਾਮ ਜਾਣ ਵਾਲੀਆਂ ਉਡਾਣਾਂ ਲਈ 2,500 ਰੁਪਏ ਦਾ ਈਂਧਨ ਸਰਚਾਰਜ ਲਾਇਆ ਗਿਆ ਹੈ।

ਏਅਰਲਾਈਨਾਂ ਨੇ ਕਿਹਾ ਕਿ ਹਵਾਈ ਈਂਧਨ ਦੀਆਂ ਕੀਮਤਾਂ ਵਿੱਚ ਲਗਾਤਾਰ ਵਾਧੇ ਅਤੇ ਉਤਰਾਅ-ਚੜ੍ਹਾਅ ਕਾਰਨ ਇਹ ਕਦਮ ਚੁੱਕਿਆ ਗਿਆ ਹੈ। ਕੌਮਾਂਤਰੀ ਪੱਧਰ ’ਤੇ ਊਰਜਾ ਬਾਜ਼ਾਰ ’ਤੇ ਪੈ ਰਹੇ ਦਬਾਅ ਅਤੇ ਭੂ-ਸਿਆਸੀ ਘਟਨਾਵਾਂ ਨੇ ਵੀ ਈਂਧਨ ਦੀਆਂ ਕੀਮਤਾਂ ਨੂੰ ਪ੍ਰਭਾਵਿਤ ਕੀਤਾ ਹੈ।

ਏਅਰਲਾਈਨਾਂ ਦੇ ਸੰਚਾਲਨ ਖਰਚੇ ਵਿੱਚ ਈਂਧਨ ਦਾ ਵੱਡਾ ਹਿੱਸਾ ਹੁੰਦਾ ਹੈ। ਏਅਰ ਇੰਡੀਆ ਅਤੇ ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਕਿਹਾ ਕਿ ਨਵਾਂ ਸਰਚਾਰਜ ਵਧੇ ਹੋਏ ਈਂਧਨ ਖਰਚੇ ਦਾ ਕੁਝ ਹਿੱਸਾ ਪੂਰਾ ਕਰਨ ਲਈ ਲਾਇਆ ਗਿਆ ਹੈ। ਅਕਾਸਾ ਏਅਰ ਨੇ ਵੀ ਕਿਹਾ ਕਿ ਉਸ ਨੇ ਈਂਧਨ ਦੀਆਂ ਮੌਜੂਦਾ ਕੀਮਤਾਂ ਦੇ ਪ੍ਰਭਾਵ ਨੂੰ ਕੁਝ ਹੱਦ ਤੱਕ ਘਟਾਉਣ ਲਈ ਇਹ ਕਦਮ ਚੁੱਕਿਆ ਹੈ।

ਤਿੰਨਾਂ ਏਅਰਲਾਈਨਾਂ ਨੇ ਕਿਹਾ ਕਿ ਈਂਧਨ ਦੀਆਂ ਕੀਮਤਾਂ ਅਤੇ ਸਮੁੱਚੇ ਸੰਚਾਲਨ ਹਾਲਾਤ ਦੇ ਆਧਾਰ ’ਤੇ ਸਰਚਾਰਜ ਦੀ ਸਮੇਂ-ਸਮੇਂ ’ਤੇ ਸਮੀਖਿਆ ਕੀਤੀ ਜਾਵੇਗੀ।